ಮಗಳು ಹೇಳಿದಳು-
ನಿನ್ನೆಯೂ ದೋಸೆ ಇವತ್ತೂ ದೋಸೆ
ಅಮ್ಮ ನಿನ್ನದೇನು ವರಸೆ?
ನೀ ಬದಲಾಗಬೇಕು
ರುಚಿ ಬದಲಾಯಿಸಬೇಕು
ಮಗ ಹೇಳಿದ-
ಮೊನ್ನೆಯೂ ಇದೇ ಚಡ್ಡಿ
ಇವತ್ತೂ ಇದೇ ಚಡ್ಡಿ
ಬೆವರು ನಾರುತ್ತಿದೆ
ಗೆಳೆಯರು ಮೂಗು ಮುಚ್ಚಿಕೊಳ್ಳುತ್ತಿದ್ದಾರೆ
ಬದಲಾಯಿಸು ಅನ್ನುತ್ತಿದ್ದಾರೆ
ಅಮ್ಮ ಬೇರೆಯದು ಕೊಡು
ಸ್ವಲ್ಪ ಹರಿದಿದ್ದರೂ ಅಡ್ಡಿಯಿಲ್ಲ
ಕೊಳಕಾದುದು ಬೇಡವೇ ಬೇಡ
ಅತ್ತೆ ಹೇಳಿದಳು-
ಈ ಚಾಳೀಸು ಬದಲಿಸಬೇಕು ಮಗಳೆ
ಹತ್ತು ವರ್ಷದ ಹಿಂದೆ ಖರೀದಿಸಿದ್ದು
ನಂಬರು ಬದಲಾಗಿದೆ ದೃಷ್ಟಿ ಮಂಜಾಗಿದೆ
ಟೀವಿಯಲ್ಲಿ ಯಾರನ್ನೋ ಕಂಡರೆ
ಯಾರನ್ನೋ ಕಂಡಂತೆ
ಮುಖವಿದ್ದರೂ ಮಖವಾಡ ಧರಿಸಿದವರಂತೆ
ರಾಮನ ಮಾತು ಕೇಳುತ್ತದೆ
ಆದರೆ ಚಹರೆ ರಾವಣನದು
ಸೀತೆಯೋ ಶೂರ್ಪನಖಿಯೋ
ಒಂದೂ ತಿಳಿಯುತ್ತಿಲ್ಲ
ಚಾಳೀಸು ಮೊದಲು ಬದಲಾಯಿಸಬೇಕು
ಗಂಡ ಹೇಳಿದ-
ಅದೇನು ನಿನ್ನ ಹಾಡು ನಿತ್ಯ
ಸುಳ್ಳು ಹೇಳಿದ್ದೇ ಹೇಳಿದರೆ ಆಗುವುದೇ ಸತ್ಯ?
ಆಶಾನೋ, ಲತಾನೋ, ರೆಹಮಾನೋ
ಕೇಳಿದ್ದೇ ಕೇಳುತ್ತಿದ್ದರೆ ಕರ್ಣ ಕಠೋರ
ಮೊದಲು ಬದಲಾಯಿಸು ಹಳೆಯ ಕ್ಯಾಸೆಟ್ಟು
ಅದರ ಜಾಗ ಏನಿದ್ದರೂ ಈಗ ಕಸದ ಬಕೆಟ್ಟು
ಈಗ ಅವಳದೇ ಸ್ವಗತ-
ಯಾರಿಗೂ ನನ್ನ ಮಾತು ಕೇಳಲು
ಇಲ್ಲ ಪುರುಸೊತ್ತು
ಹಂದಿಗಳು ಬೇಲಿ ಮುರಿದು ಒಳಗೆ ಬರುತ್ತಿವೆ
ಪಕ್ಕದ ಸೈಟಿನವನು ಬೇಲಿಯನ್ನೇ
ಕಿತ್ತು ಒತ್ತುವರಿ ಮಾಡಿದ್ದಾನೆ
ಮನೆಯ ಕೀಲಿ ಹಾಕಿದ್ದು ಹಾಕಿದ್ದಂತೆಯೇ ಇದೆ
ಅಜ್ಜನ ಕಾಲದ ಹಂಡೆ ಕೊಡಪಾನ
ಕಲಬಿಯಲ್ಲಿಟ್ಟ ದೇವರ ಸಾಮಾನ
ಕಪಾಟಿನಲ್ಲಿ ಬಚ್ಚಿಟ್ಟ ನವರತ್ನದ ಹಾರ
ಕದ್ದು ಹೋದನೆ ಚೋರ?
ಎಲ್ಲಿ ಹೋದ ಚೌಕಿದಾರ?
ಅಂದಿದ್ದನಲ್ಲ ನೀವೇ ನನ್ನ ಪರಿವಾರ!
ಕಂಡುಕೊಳ್ಳಲೇಬೇಕು
ನಮಗೆ ನಾವೇ ಪರಿಹಾರ
ನಾಳೆಯೇ ಇದೆ ಬಡಾವಣೆಯ
ಮ್ಯಾನೇಜ್‌ಮೆಂಟ್‌ ಕಮಿಟಿಯ
ಜನರಲ್‌ ಬಾಡಿ ಮೀಟಿಂಗು
ನನ್ನದೊಂದೇ ಡಿಮಾಂಡು
ಬದಲಾಯಿಸಲೇ ಬೇಕು ಕಮಾಂಡು
ನಿಮಗೊಪ್ಪಿಗೆಯಾದರೆ ಎತ್ತಿ ಕೈ
ನಾವು ಬದಲಾಗಬೇಕು
ನಾವು ಬದಲಾಯಿಸಬೇಕು
ನಾನು ವಾಸುದೇವ ಶೆಟ್ಟಿ. ನನ್ನೂರು ಹೊನ್ನಾವರ ತಾಲೂಕಿನ ಜಲವಳ್ಳಿ. 5ನೆ ತರಗತಿಯ ವರೆಗೆ ನಮ್ಮೂರಿನ ಶಾಲೆಯಲ್ಲಿಯೇ ಓದಿದೆ. ನಂತರ ಹೊನ್ನಾವರದ ನ್ಯೂ ಇಂಗ್ಲಿಷ್ ಸ್ಕೂಲ್‌ನಲ್ಲಿ 10ನೆ ತರಗತಿಯ ವರೆಗೆ. ಹೊನ್ನಾವರದ ಎಸ್‌ಡಿಎಂ ಕಾಲೇಜಿನಲ್ಲಿ ಪದವಿ ಶಿಕ್ಷಣ. ಧಾರವಾಡದ ಕವಿವಿಯಲ್ಲಿ ಕನ್ನಡದಲ್ಲಿ ಎಂ.ಎ. ನಂತರ ಹಂಪಿ ಕನ್ನಡ ವಿಶ್ವವಿದ್ಯಾನಿಲಯದಿಂದ ಆಧುನಿಕ ಕನ್ನಡ ಸಾಹಿತ್ಯದ ಬೆಳವಣಿಗೆಯಲ್ಲಿ ಪತ್ರಿಕೆಗಳ ಪಾತ್ರ ಎಂಬ ವಿಷಯದಲ್ಲಿ ಪಿಎಚ್‌.ಡಿ ಪದವಿ. ಕಾರವಾರದ ಬಾಡದ ಶಿವಾಜಿ ಕಾಲೇಜಿನಲ್ಲಿ ಮೂರು ವರ್ಷ ಅರೆಕಾಲಿಕ ಉಪನ್ಯಾಸಕ. ಹಾಗೆಯೇ ಕಾರವಾರದ ಸರ್ಕಾರಿ ಕಲಾ ವಿಜ್ಞಾನ ಕಾಲೇಜಿನಲ್ಲೂ ಒಂದು ವರ್ಷ ಉಪನ್ಯಾಸಕನಾಗಿ ಸೇವೆ. ಬಳಿಕ ಎರಡು ವರ್ಷ ಊರಿನಲ್ಲಿ ವ್ಯವಸಾಯ. ನಡುವೆ 1989ರಲ್ಲಿ ಸರೋಜಿನಿಯೊಂದಿಗೆ ಮದುವೆ. 1990ರಲ್ಲಿ ನನ್ನ ಮಗನ ಜನನ. ಜೊತೆಗೆ ನಾನು ಪತ್ರಿಕಾರಂಗವನ್ನು ನನ್ನ ವೃತ್ತಿಯನ್ನಾಗಿ ಸ್ವೀಕರಿಸಿದೆ. ಬೆಳಗಾವಿಯಲ್ಲಿ ರಾಘವೇಂದ್ರ ಜೋಶಿಯವರ ನಾಡೋಜ, ಹುಬ್ಬಳ್ಳಿಯ ಸಂಯುಕ್ತ ಕರ್ನಾಟಕ, ಬೆಳಗಾವಿಯ ಕನ್ನಡಮ್ಮ, ಸಮತೋಲ ಸಂಜೆ ಪತ್ರಿಕೆ ಹೀಗೆ ಆರು ವರ್ಷ ತಳ ಮಟ್ಟದ ಪತ್ರಿಕೋದ್ಯಮದ ಜ್ಞಾನದೊಂದಿಗೆ 1997ರ ಫೆಬ್ರವರಿ 18ರಂದು ಬೆಳಗಾವಿಯ ಕನ್ನಡಪ್ರಭದಲ್ಲಿ ಉಪಸಂಪಾದಕನಾಗಿ ಸೇರಿದೆ. ಹಂತಹಂತವಾಗಿ ವೃತ್ತಿಯಲ್ಲಿ ಅನುಭವ ಪಡೆಯುತ್ತ ಪದೋನ್ನತಿಯನ್ನು ಪಡೆಯುತ್ತ ಬಂದಿದ್ದೇನೆ. ಪತ್ನಿ, ಮಗ, ಮಗಳು ಮತ್ತು ನಾನು. ಇದೇ ನನ್ನ ಖಾಸಗಿ ಪ್ರಪಂಚ. ಈ ಜಾಲತಾಣದಲ್ಲಿ ನಾನು ಬರೆದ ಎಲ್ಲ ರೀತಿಯ ಲೇಖನಗಳನ್ನು ಒಂದೊಂದಾಗಿ ಸೇರಿಸುತ್ತ ಹೋಗುತ್ತೇನೆ. ಓದಿ, ನಿಮಗೇನಾದರೂ ಅನ್ನಿಸಿದರೆ ಅದನ್ನು ದಾಖಲಿಸಿ.