*ಮಾಡಬಾರದ್ದನ್ನು ಮಾಡಿ ಫಜೀತಿಗಿಟ್ಟುಕೊಳ್ಳುವುದು
ಮಾಡಬಾರದ್ದನ್ನು ಮಾಡಲು ಹೋಗಿ ಪೆಟ್ಟು ತಿಂದವರನ್ನು ಕಂಡಾಗ ಇಂಗು ತಿಂದ ಮಂಗನಂತಾದ ಎದು ಹೇಳುವುದನ್ನು ಕೇಳಿದ್ದೇವೆ. ಮಂಗ ಯಾವತ್ತಾದರೂ ಇಂಗನ್ನು ತಿಂದುದನ್ನು ಕಂಡಿದ್ದೀರಾ? ಇಂಗು ನಮ್ಮ ನೆಲದ ಬೆಳೆ ಏನಲ್ಲ. ಹೀಗಿರುವಾಗ ಮಂಗ ಇಂಗು ತಿನ್ನುವುದಾದರೂ ಹೇಗೆ? ಇಂಗು ತಿಂದರೆ ಮಂಗನಿಗೆ ಏನಾಗುತ್ತದೆ?
ಇಂಗಿನ ಮೂಲ ಇರಾನ್‌. ಅಫ್ಘಾನಿಸ್ತಾನದಲ್ಲೂ ಇಂಗನ್ನು ಬೆಳೆಯುತ್ತಾರೆ. ಅದೇ ರೀತಿ ಟೆಕ್ಸಾಸ್‌- ಮೆಕ್ಸಿಕೋದ ಗಡಿಯಲ್ಲೂ ಇಂಗನ್ನು ಬೆಳೆಯುತ್ತಾರೆ. ಸುಮಾರು ಎರಡು ಮೀಟರ್‌ ಎತ್ತರಕ್ಕೆ ಬೆಳೆಯುವ ಇಂಗದ ಗಿಡದ ಕಾಂಡ ಟೊಳ್ಳಾಗಿರುತ್ತದೆ. ಇದು ತಳದಲ್ಲಿ ಏಳೆಂಟು ಸೆಂ.ಮೀ. ಸುತ್ತಳತೆ ಹೊಂದಿರುತ್ತದೆ. ಇದರ ಎಲೆಗಳು 30ರಿಂದ 40 ಸೆಂ.ಮೀ. ಉದ್ದವಾಗಿರುತ್ತವೆ. ಇದರ ಹೂಗಳು ಹಳದಿ.
ಇದಕ್ಕೆ ಔಷಧೀಯ ಗುಣವಿದೆ. ಹೊಟ್ಟೆ ಉಬ್ಬರ, ಅಜೀರ್ಣ ಇತ್ಯಾದಿ ರೋಗ ಶಮನಕ್ಕೆ ಇದನ್ನು ಬಳಸುತ್ತಾರೆ. ಅಡುಗೆಯಲ್ಲಿ ಪರಿಮಳಕ್ಕಾಗಿ ಮತ್ತು ಔಷಧೀಯ ಗುಣ ಹೊಂದಿರುವುದಕ್ಕಾಗಿ ಇಂಗನ್ನು ಬಳಸುತ್ತಾರೆ. ಇನ್ನೊಂದು ಸ್ವಾರಸ್ಯಕರ ಅಂಶವೆಂದರೆ, ಈರುಳ್ಳಿ ಅಥವಾ ಬೆಳ್ಳುಳ್ಳಿಯನ್ನು ಬಳಸದ ಜೈನ ಮತ್ತು ವೈಷ್ಣವ ಧರ್ಮದವರು ಅದಕ್ಕೆ ಪರ್ಯಾಯವಾಗಿ ಇಂಗನ್ನು ಬಳಸುತ್ತಾರಂತೆ.
ಇಂಗನ್ನು ಹಸಿಯಾಗಿ ತಿನ್ನಬಾರದು. ಇಂಗಿನ ಕಾಂಡವನ್ನು ಹಸಿಯಾಗಿ ತಿಂದರೆ ವಾಂತಿ ಮತ್ತು ಭೇದಿ ಎರಡೂ ಒಟ್ಟಿಗೆ ಶುರುವಾಗುತ್ತದೆ. ಮಂಗ ಕೂಡ ಇಂಗನ್ನು ಈ ರೀತಿ ತಿಂದು ಫಜೀತಿಗೆ ಒಳಗಾಗಿರಬಹುದು. ಅದಕ್ಕಾಗಿಯೇ `ಇಂಗು ತಿಂದ ಮಂಗ’ ಆಗಿರಬಹುದು. ಇನ್ನೊಂದು ಸ್ವಾರಸ್ಯಕರ ವಿಷಯವೆಂದರೆ ಮೆಕ್ಸಿಕೋದ ಗಡಿಯಲ್ಲಿ ತೋಳಗಳೂ ಇಂಗಿನ ವಾಸನೆಗೆ ಮರುಳಾಗುತ್ತವಂತೆ.
ನಾನು ವಾಸುದೇವ ಶೆಟ್ಟಿ. ನನ್ನೂರು ಹೊನ್ನಾವರ ತಾಲೂಕಿನ ಜಲವಳ್ಳಿ. 5ನೆ ತರಗತಿಯ ವರೆಗೆ ನಮ್ಮೂರಿನ ಶಾಲೆಯಲ್ಲಿಯೇ ಓದಿದೆ. ನಂತರ ಹೊನ್ನಾವರದ ನ್ಯೂ ಇಂಗ್ಲಿಷ್ ಸ್ಕೂಲ್‌ನಲ್ಲಿ 10ನೆ ತರಗತಿಯ ವರೆಗೆ. ಹೊನ್ನಾವರದ ಎಸ್‌ಡಿಎಂ ಕಾಲೇಜಿನಲ್ಲಿ ಪದವಿ ಶಿಕ್ಷಣ. ಧಾರವಾಡದ ಕವಿವಿಯಲ್ಲಿ ಕನ್ನಡದಲ್ಲಿ ಎಂ.ಎ. ನಂತರ ಹಂಪಿ ಕನ್ನಡ ವಿಶ್ವವಿದ್ಯಾನಿಲಯದಿಂದ ಆಧುನಿಕ ಕನ್ನಡ ಸಾಹಿತ್ಯದ ಬೆಳವಣಿಗೆಯಲ್ಲಿ ಪತ್ರಿಕೆಗಳ ಪಾತ್ರ ಎಂಬ ವಿಷಯದಲ್ಲಿ ಪಿಎಚ್‌.ಡಿ ಪದವಿ. ಕಾರವಾರದ ಬಾಡದ ಶಿವಾಜಿ ಕಾಲೇಜಿನಲ್ಲಿ ಮೂರು ವರ್ಷ ಅರೆಕಾಲಿಕ ಉಪನ್ಯಾಸಕ. ಹಾಗೆಯೇ ಕಾರವಾರದ ಸರ್ಕಾರಿ ಕಲಾ ವಿಜ್ಞಾನ ಕಾಲೇಜಿನಲ್ಲೂ ಒಂದು ವರ್ಷ ಉಪನ್ಯಾಸಕನಾಗಿ ಸೇವೆ. ಬಳಿಕ ಎರಡು ವರ್ಷ ಊರಿನಲ್ಲಿ ವ್ಯವಸಾಯ. ನಡುವೆ 1989ರಲ್ಲಿ ಸರೋಜಿನಿಯೊಂದಿಗೆ ಮದುವೆ. 1990ರಲ್ಲಿ ನನ್ನ ಮಗನ ಜನನ. ಜೊತೆಗೆ ನಾನು ಪತ್ರಿಕಾರಂಗವನ್ನು ನನ್ನ ವೃತ್ತಿಯನ್ನಾಗಿ ಸ್ವೀಕರಿಸಿದೆ. ಬೆಳಗಾವಿಯಲ್ಲಿ ರಾಘವೇಂದ್ರ ಜೋಶಿಯವರ ನಾಡೋಜ, ಹುಬ್ಬಳ್ಳಿಯ ಸಂಯುಕ್ತ ಕರ್ನಾಟಕ, ಬೆಳಗಾವಿಯ ಕನ್ನಡಮ್ಮ, ಸಮತೋಲ ಸಂಜೆ ಪತ್ರಿಕೆ ಹೀಗೆ ಆರು ವರ್ಷ ತಳ ಮಟ್ಟದ ಪತ್ರಿಕೋದ್ಯಮದ ಜ್ಞಾನದೊಂದಿಗೆ 1997ರ ಫೆಬ್ರವರಿ 18ರಂದು ಬೆಳಗಾವಿಯ ಕನ್ನಡಪ್ರಭದಲ್ಲಿ ಉಪಸಂಪಾದಕನಾಗಿ ಸೇರಿದೆ. ಹಂತಹಂತವಾಗಿ ವೃತ್ತಿಯಲ್ಲಿ ಅನುಭವ ಪಡೆಯುತ್ತ ಪದೋನ್ನತಿಯನ್ನು ಪಡೆಯುತ್ತ ಬಂದಿದ್ದೇನೆ. ಪತ್ನಿ, ಮಗ, ಮಗಳು ಮತ್ತು ನಾನು. ಇದೇ ನನ್ನ ಖಾಸಗಿ ಪ್ರಪಂಚ. ಈ ಜಾಲತಾಣದಲ್ಲಿ ನಾನು ಬರೆದ ಎಲ್ಲ ರೀತಿಯ ಲೇಖನಗಳನ್ನು ಒಂದೊಂದಾಗಿ ಸೇರಿಸುತ್ತ ಹೋಗುತ್ತೇನೆ. ಓದಿ, ನಿಮಗೇನಾದರೂ ಅನ್ನಿಸಿದರೆ ಅದನ್ನು ದಾಖಲಿಸಿ.