ಹೆಮ್ಮರವೊಂದು ಹೂ ತಳೆದಿರಲು
ಪುಂಕೇಶರ ಸ್ತ್ರೀ ಕೇಶರಗಳ ಸಾಮೀಪ್ಯಕ್ಕಾಗಲಿ
ಸಹಜ ಪರಾಗಸ್ಪರ್ಶ ಕ್ರಿಯೆಗಾಗಲಿ
ನಾ ಕಾರಣನಲ್ಲ.
ನಾ ಜವಾಬುದಾರನಾಗದೆ ಅಂಡದೊಳಗೆ
ಅಂಕುರಿಸಿ ಬಿಟ್ಟೆ
ಮರದ ತುತ್ತತುದಿಯ ಹೆಣೆಯಲ್ಲಿ
ಮಿಜರಾದೆ, ಮಿಡಿಯಾಗಿ ಬೆಳೆದೆ
ದೋರಗಾಯಾಗಿ ಕೆಂಪಡರುವ ಹೊತ್ತಿಗೆ
ನನ್ನ ಹೊತ್ತ ಮರಕ್ಕೆ ಹೆಮ್ಮೆಯೋ ಹೆಮ್ಮೆ
ನಾಲ್ಕು ಜನ ಕಾಣುವ ಹಾಗೆ ಹೆಣೆಯನ್ನು
ಜೀಕಿದ್ದೇ ಜೀಕಿದ್ದು
ಜೀಕಿದ್ದು ಹೆಚ್ಚಾಗಿಯೋ ಏನೋ
ಒಂದು ದಿನ ನಾನು ತೊಟ್ಟು
ಹರಿದುಕೊಂಡು ಕೆಳಕ್ಕೆ ಬಿದ್ದೆ
ಅಲ್ಲಿಗೇ ನನ್ನದೆಲ್ಲ ಮುಗಿಯಿತು
ಅಂದುಕೊಂಡರೆ ಆಗತಾನೆ
ಬದುಕು ಆರಂಭ
ನನ್ನ ಹೊತ್ತವರು ಮತ್ತೆ
ತೊಟ್ಟು ಕಳಚಿ ಕೆಳಗಿಟ್ಟವರು
ಬೇರಿಳಿಸಿದಲ್ಲೇ ನನ್ನದೂ ಬೇರಿಳಿಯಿತು
ಹೊತ್ತವರ ಅಕ್ಕರೆಯೆ ಚಪ್ಪರವಾದಂತೆ
ಬಿಸಿಲು ನನ್ನತ್ತ ಮುಖ ಮಾಡಲೇ ಇಲ್ಲ
ತೆಪ್ಪನೆ ಬಿಗಿದು ಕುಳಿತರೂ
ಕುಂಡೆ ಚಿವುಟುವ, ತಿನ್ನಲೆಂದು
ಕೈಗೆತ್ತಿಕೊಂಡದ್ದನ್ನು ಕಸಿದುಣ್ಣುವ ನನ್ನಂಥವರೆ,
ಬಂಧುಗಳು. ಸಾಕಪ್ಪಾ ಸಾಕು
ಯಾರಾದರೂ ಒಯ್ದು ಈ ಚಕ್ರ ವ್ಯೂಹದಿಂದ
ಪಾರುಮಾಡಬಾರದೆ ನನ್ನನ್ನು
ಎಂದು ಹಂಬಲಿಸಿದ್ದೇ ಹಂಬಲಿಸಿದ್ದು.
ಇಚ್ಛೆಯ ಉತ್ಕಟತೆ ಯಾರಿಗೋ
ತಟ್ಟಿತು. ನನ್ನ ಒಯ್ದರು.
ನನ್ನದೇ ಜಾತಿಯ ಇನ್ನೊಂದು
ಮರದ ಹೆಣೆಗೆ ನನ್ನ ಕಸಿ ಮಾಡಿದರು
ಬಿಸಿಲ ಮುತ್ತಿಗೆ ಪುಳಕಗೊಂಡೆ
ಕೆಂಪ ಚಿಗುರಿಸಲು ಹಳದಿ
ಹೂವಿಸಲು ಕನಸ ಕಂಡೆ
ಹೊಸ ಬದುಕಿಗೆ ಸಂತಸಗೊಳ್ಳುತ್ತಿರುವಾಗಲೆ
ನನ್ನ ಶಿರಃಛೇದನ ನಡೆದೇ ಹೋಯಿತು.
‘ಹಯವದನನ’ ಅಪರಾವತಾರದೊಂದಿಗೆ
ನನ್ನ ಬೇರು ಮತ್ತೆ ಮಣ್ಣೊಳಗೆ ಇಳಿಯತೊಡಗಿತು.
ನಾನು ನಾನೇ ಆಗಬಯಸಿದರೆ
ಇನ್ನೇನೋ ಆಗಿ ಬಿಟ್ಟೆ.
ಇದೀಗ ಈ ನನ್ನದಲ್ಲದ ಬದುಕಿಗೆ
ವಿದಾಯ ಹೇಳ ಬಯಸುತ್ತಿದ್ದೇನೆ.
೧೧-೧೦-೮೯
ನಾನು ವಾಸುದೇವ ಶೆಟ್ಟಿ. ನನ್ನೂರು ಹೊನ್ನಾವರ ತಾಲೂಕಿನ ಜಲವಳ್ಳಿ. 5ನೆ ತರಗತಿಯ ವರೆಗೆ ನಮ್ಮೂರಿನ ಶಾಲೆಯಲ್ಲಿಯೇ ಓದಿದೆ. ನಂತರ ಹೊನ್ನಾವರದ ನ್ಯೂ ಇಂಗ್ಲಿಷ್ ಸ್ಕೂಲ್‌ನಲ್ಲಿ 10ನೆ ತರಗತಿಯ ವರೆಗೆ. ಹೊನ್ನಾವರದ ಎಸ್‌ಡಿಎಂ ಕಾಲೇಜಿನಲ್ಲಿ ಪದವಿ ಶಿಕ್ಷಣ. ಧಾರವಾಡದ ಕವಿವಿಯಲ್ಲಿ ಕನ್ನಡದಲ್ಲಿ ಎಂ.ಎ. ನಂತರ ಹಂಪಿ ಕನ್ನಡ ವಿಶ್ವವಿದ್ಯಾನಿಲಯದಿಂದ ಆಧುನಿಕ ಕನ್ನಡ ಸಾಹಿತ್ಯದ ಬೆಳವಣಿಗೆಯಲ್ಲಿ ಪತ್ರಿಕೆಗಳ ಪಾತ್ರ ಎಂಬ ವಿಷಯದಲ್ಲಿ ಪಿಎಚ್‌.ಡಿ ಪದವಿ. ಕಾರವಾರದ ಬಾಡದ ಶಿವಾಜಿ ಕಾಲೇಜಿನಲ್ಲಿ ಮೂರು ವರ್ಷ ಅರೆಕಾಲಿಕ ಉಪನ್ಯಾಸಕ. ಹಾಗೆಯೇ ಕಾರವಾರದ ಸರ್ಕಾರಿ ಕಲಾ ವಿಜ್ಞಾನ ಕಾಲೇಜಿನಲ್ಲೂ ಒಂದು ವರ್ಷ ಉಪನ್ಯಾಸಕನಾಗಿ ಸೇವೆ. ಬಳಿಕ ಎರಡು ವರ್ಷ ಊರಿನಲ್ಲಿ ವ್ಯವಸಾಯ. ನಡುವೆ 1989ರಲ್ಲಿ ಸರೋಜಿನಿಯೊಂದಿಗೆ ಮದುವೆ. 1990ರಲ್ಲಿ ನನ್ನ ಮಗನ ಜನನ. ಜೊತೆಗೆ ನಾನು ಪತ್ರಿಕಾರಂಗವನ್ನು ನನ್ನ ವೃತ್ತಿಯನ್ನಾಗಿ ಸ್ವೀಕರಿಸಿದೆ. ಬೆಳಗಾವಿಯಲ್ಲಿ ರಾಘವೇಂದ್ರ ಜೋಶಿಯವರ ನಾಡೋಜ, ಹುಬ್ಬಳ್ಳಿಯ ಸಂಯುಕ್ತ ಕರ್ನಾಟಕ, ಬೆಳಗಾವಿಯ ಕನ್ನಡಮ್ಮ, ಸಮತೋಲ ಸಂಜೆ ಪತ್ರಿಕೆ ಹೀಗೆ ಆರು ವರ್ಷ ತಳ ಮಟ್ಟದ ಪತ್ರಿಕೋದ್ಯಮದ ಜ್ಞಾನದೊಂದಿಗೆ 1997ರ ಫೆಬ್ರವರಿ 18ರಂದು ಬೆಳಗಾವಿಯ ಕನ್ನಡಪ್ರಭದಲ್ಲಿ ಉಪಸಂಪಾದಕನಾಗಿ ಸೇರಿದೆ. ಹಂತಹಂತವಾಗಿ ವೃತ್ತಿಯಲ್ಲಿ ಅನುಭವ ಪಡೆಯುತ್ತ ಪದೋನ್ನತಿಯನ್ನು ಪಡೆಯುತ್ತ ಬಂದಿದ್ದೇನೆ. ಪತ್ನಿ, ಮಗ, ಮಗಳು ಮತ್ತು ನಾನು. ಇದೇ ನನ್ನ ಖಾಸಗಿ ಪ್ರಪಂಚ. ಈ ಜಾಲತಾಣದಲ್ಲಿ ನಾನು ಬರೆದ ಎಲ್ಲ ರೀತಿಯ ಲೇಖನಗಳನ್ನು ಒಂದೊಂದಾಗಿ ಸೇರಿಸುತ್ತ ಹೋಗುತ್ತೇನೆ. ಓದಿ, ನಿಮಗೇನಾದರೂ ಅನ್ನಿಸಿದರೆ ಅದನ್ನು ದಾಖಲಿಸಿ.