*ಕತ್ತಿ ಅಲಗಿನೊಂದಿಗೆ ಸರಸವಾಡಿದಂತೆ ಇದು
ಕಠಿಣವಾದ ಯಾವುದಾದರೂ ಕೆಲಸವನ್ನು ಸಾಧಿಸುವುದಿದ್ದರೆ ಅದರ ಅಸಾಧ್ಯತೆಯನ್ನು ಹೇಳುವುದಕ್ಕೆ ಅದೊಂದು `ಅಸಿಧಾರಾವ್ರತ ಕಣಯ್ಯ’ ಎಂದು ಹೇಳುವುದಿದೆ.
ಅಸಿಧಾರಾ ಎಂದರೆ ಖಡ್ಗದ ಅಲಗು ಎಂದರ್ಥ. ಇದೇನು ಖಡ್ಗದ ಅಲಗಿನ ವ್ರತ? ಯವ್ವನವತಿಯಾದ ಪತ್ನಿ ಹಾಸುಗೆಯಲ್ಲಿ ಪಕ್ಕದಲ್ಲಿ ಮಲಗಿರುತ್ತಾರೆ. ಗಂಡ ಹೆಂಡತಿಯ ನಡುವೆ ಒರೆಯನ್ನು ತೆಗೆದ ಹರಿತವಾದ ಖಡ್ಗವನ್ನು ಇಟ್ಟು ರಾತ್ರಿಯನ್ನು ಕಳೆಯುವುದೇ ಈ ಅಸಿಧಾರಾ ವ್ರತ.
ಮನಸ್ಸು ಚಂಚಲವಾದರೆ ಖಡ್ಗದ ಮೇಲೆ ಶರೀರ ಬಿದ್ದು ಗಾಯವಾಗುವುದು ಖಂಡಿತ. ಯವ್ವನವತಿ ಹೆಂಡತಿಯ ಪಕ್ಕದಲ್ಲಿ ಮನಸ್ಸನ್ನು ನಿಗ್ರಹದಲ್ಲಿ ಇಟ್ಟುಕೊಂಡು ರಾತ್ರಿಯನ್ನು ಕಳೆಯುವುದೆಂದರೆ ಅದೊಂದು ಕಠಿಣ ವ್ರತವೇ ಸರಿ.
ಇಂಥ ವ್ರತವನ್ನು ಯಶಸ್ವಿಯಾಗಿ ಮುಗಿಸಬೇಕೆಂದರೆ ಮನಸ್ಸಿನ ಮೇಲೆ ನಿಗ್ರಹ ಇರಬೇಕು. ಚಪಲಚಿತ್ತದವರಿಂದ ಇದು ಸಾಧ್ಯವಾಗುವುದಿಲ್ಲ. ಗಟ್ಟಿಯಾದ ಮನಸ್ಸಿದ್ದರೆ ಮಾತ್ರ ಯಾವುದೇ ಕೆಲಸವನ್ನು ಸಾಧಿಸಬಹುದು.
ಯಾವುದನ್ನಾದರೂ ನಿಗ್ರಹಿಸಬಹುದು. ಆದರೆ ಕಾಮವನ್ನು ನಿಗ್ರಹಿಸುವುದು ಬಹು ಕಷ್ಟ ಎಂಬ ಎಚ್ಚರಿಕೆಯೂ ಇದರಲ್ಲಿದೆ. ಜಿತೇಂದ್ರಿಯತ್ವ ಎಲ್ಲರಿಗೂ ಸಾಧ್ಯವಲ್ಲ. ಚಾಪಲ್ಯ ಕೇವಲ ಲೈಂಗಿಕವಾದುದು ಆಗಿರಬೇಕಿಲ್ಲ, ಪಂಚೇಂದ್ರಿಯಗಳಲ್ಲಿ ಯಾವುದರ ದಾಸನಾದರೂ ಅದರಿಂದ ಕಷ್ಟ ಕಟ್ಟಿಟ್ಟ ಬುತ್ತಿ.
ಕೆಲವರಿಗೆ ನಾಲಿಗೆಯ ಚಪಲ, ಕೆಲವರಿಗೆ ನೋಡುವ ಚಪಲ, ಕೆಲವರಿಗೆ ಕೇಳುವ ಚಪಲ, ಇನ್ನೂ ಕೆಲವರಿಗೆ ಮಾತಿನ ಚಪಲ. ಮನಸ್ಸನ್ನು ಲಗಾಮಿಲ್ಲದ ಹುಚ್ಚು ಕುದುರೆಗೆ ಹೋಲಿಸಿದ್ದಾರೆ ಹಿರಿಯರು. ಅದಕ್ಕೆ ಲಗಾಮು ಹಾಕಿ ಸವಾರಿ ಮಾಡಬಲ್ಲವನೇ ಸಂಸಾರ ಸಾಗರವನ್ನು ಸುಲಭವಾಗಿ ದಾಟಬಲ್ಲ.
ನಾನು ವಾಸುದೇವ ಶೆಟ್ಟಿ. ನನ್ನೂರು ಹೊನ್ನಾವರ ತಾಲೂಕಿನ ಜಲವಳ್ಳಿ. 5ನೆ ತರಗತಿಯ ವರೆಗೆ ನಮ್ಮೂರಿನ ಶಾಲೆಯಲ್ಲಿಯೇ ಓದಿದೆ. ನಂತರ ಹೊನ್ನಾವರದ ನ್ಯೂ ಇಂಗ್ಲಿಷ್ ಸ್ಕೂಲ್‌ನಲ್ಲಿ 10ನೆ ತರಗತಿಯ ವರೆಗೆ. ಹೊನ್ನಾವರದ ಎಸ್‌ಡಿಎಂ ಕಾಲೇಜಿನಲ್ಲಿ ಪದವಿ ಶಿಕ್ಷಣ. ಧಾರವಾಡದ ಕವಿವಿಯಲ್ಲಿ ಕನ್ನಡದಲ್ಲಿ ಎಂ.ಎ. ನಂತರ ಹಂಪಿ ಕನ್ನಡ ವಿಶ್ವವಿದ್ಯಾನಿಲಯದಿಂದ ಆಧುನಿಕ ಕನ್ನಡ ಸಾಹಿತ್ಯದ ಬೆಳವಣಿಗೆಯಲ್ಲಿ ಪತ್ರಿಕೆಗಳ ಪಾತ್ರ ಎಂಬ ವಿಷಯದಲ್ಲಿ ಪಿಎಚ್‌.ಡಿ ಪದವಿ. ಕಾರವಾರದ ಬಾಡದ ಶಿವಾಜಿ ಕಾಲೇಜಿನಲ್ಲಿ ಮೂರು ವರ್ಷ ಅರೆಕಾಲಿಕ ಉಪನ್ಯಾಸಕ. ಹಾಗೆಯೇ ಕಾರವಾರದ ಸರ್ಕಾರಿ ಕಲಾ ವಿಜ್ಞಾನ ಕಾಲೇಜಿನಲ್ಲೂ ಒಂದು ವರ್ಷ ಉಪನ್ಯಾಸಕನಾಗಿ ಸೇವೆ. ಬಳಿಕ ಎರಡು ವರ್ಷ ಊರಿನಲ್ಲಿ ವ್ಯವಸಾಯ. ನಡುವೆ 1989ರಲ್ಲಿ ಸರೋಜಿನಿಯೊಂದಿಗೆ ಮದುವೆ. 1990ರಲ್ಲಿ ನನ್ನ ಮಗನ ಜನನ. ಜೊತೆಗೆ ನಾನು ಪತ್ರಿಕಾರಂಗವನ್ನು ನನ್ನ ವೃತ್ತಿಯನ್ನಾಗಿ ಸ್ವೀಕರಿಸಿದೆ. ಬೆಳಗಾವಿಯಲ್ಲಿ ರಾಘವೇಂದ್ರ ಜೋಶಿಯವರ ನಾಡೋಜ, ಹುಬ್ಬಳ್ಳಿಯ ಸಂಯುಕ್ತ ಕರ್ನಾಟಕ, ಬೆಳಗಾವಿಯ ಕನ್ನಡಮ್ಮ, ಸಮತೋಲ ಸಂಜೆ ಪತ್ರಿಕೆ ಹೀಗೆ ಆರು ವರ್ಷ ತಳ ಮಟ್ಟದ ಪತ್ರಿಕೋದ್ಯಮದ ಜ್ಞಾನದೊಂದಿಗೆ 1997ರ ಫೆಬ್ರವರಿ 18ರಂದು ಬೆಳಗಾವಿಯ ಕನ್ನಡಪ್ರಭದಲ್ಲಿ ಉಪಸಂಪಾದಕನಾಗಿ ಸೇರಿದೆ. ಹಂತಹಂತವಾಗಿ ವೃತ್ತಿಯಲ್ಲಿ ಅನುಭವ ಪಡೆಯುತ್ತ ಪದೋನ್ನತಿಯನ್ನು ಪಡೆಯುತ್ತ ಬಂದಿದ್ದೇನೆ. ಪತ್ನಿ, ಮಗ, ಮಗಳು ಮತ್ತು ನಾನು. ಇದೇ ನನ್ನ ಖಾಸಗಿ ಪ್ರಪಂಚ. ಈ ಜಾಲತಾಣದಲ್ಲಿ ನಾನು ಬರೆದ ಎಲ್ಲ ರೀತಿಯ ಲೇಖನಗಳನ್ನು ಒಂದೊಂದಾಗಿ ಸೇರಿಸುತ್ತ ಹೋಗುತ್ತೇನೆ. ಓದಿ, ನಿಮಗೇನಾದರೂ ಅನ್ನಿಸಿದರೆ ಅದನ್ನು ದಾಖಲಿಸಿ.